Dopu à avè fattu i nostri primi "Passi di vita" ; sempre sulcati d'amicizia è di passione ind'è noi è da mare in là; ci hè tuccatu à francà un antru passu. Stu passu seria forse quellu di a maturità è quellu di u militantisimu culturale, da tandu ci avviemu ind'un chjassu novu. Circhemu oghje più chè mai à esse presenti à nantu à u terrenu per cantà una messa quandu u bisognu pugne. À impaghjellà in ogni occasione.

L'ammaestranza d'issu spaziu si face soprattuttu in a tramandera di u corsu in scola, di u cantu in paghjella in parechji rughjoni, assicurendu tandu à issu cantu tradiziunale, a so funzione suciale chì u definisce. Noi vulemu sparte altre cose ch'è a respunsabilità cumuna di a situazione induv'ella si trova a nostra Cursichella. Salvà una lingua è una cultura hè una lotta d'ogni ghjornu. À fiancu à d'altri è di pettu à certi si face è si ferà sempre à sta manera. Hè tandu ch'emu decisu di pruduce un dischettu à di per noi, per ùn esse ligati à nisunu è mantene a nostra « libertà culturale ». I nostri scritti è e nostre mente si volenu arradicati à l'oramai in a Corsica madre, in u mentre chì e nostre musiche è e nostre cuscenze si spannanu à fil di l'anni chì scorrenu. È ghjè precisamente in un versu di a puesia « Des rayons et des ombres » (1840) di Victor Hugo, ch'emu trovu l'estru per issu discu novu :  « Qui prend le passé pour racine a pour feuillage l'avenir. » È tandu, ci vene in core e rime di u pueta tavagnincu Paoli di Tagliu chì scrisse stu famosu capidopera nustrale « u Lamentu di u castagnu à u Corsu » in u 1927 : chì i rasgi d'Hugo spanninu e radiche di u castagnu corsu. Dedichemu d'un cantu, stu dischettu à i nostri vechji chì di leva in purleva ci anu trasmessu sta lascita, quella di a lingua è di a cultura, d'un antru cantu, à tutti sti giovani chì s'impegnanu in a nostra cultura, ch'elli cantinu, parlinu è tramandinu u nostru patrimoniu da inventà a Corsica di dumane. Ch'ella si fia sempre cusì oghje è per secula seculoru…